Службы святым женам
Служба прпп Иулиании и Евпраксии
Месяца маиа в 3-й день
Преподобных Иулиании и Евпраксии Московских
На велицей вечерни
На Господи, воззвах: стихиры на 8, глас 5.
Подобен: Радуйся, Живоносный Кресте:
Приидите, благочестивии людие,/ почтим торжество обители Зачатиевския/ и в песнех возвеличим наставницы премудрыя,/ преподобныя Иулианию и Евпраксию,/ теплыя предстательницы нашя пред Господем,/ и с любовию к ним возопиим:/ Христа Бога усердно молите/ низпослати душам нашим мир и велию милость.
Прозябения райская земли Российския,/ сестры по плоти святителя Алексия,/ преподобныя Иулиание и Евпраксие,/ вы, издетска уневестившяся Христу Богу,/ основание первыя девичия обители/ во граде Москве положили есте/ и к Небесному Жениху многия девы привели есте./ Емуже усердно молитеся/ даровати нам мир и велию милость.
Ублажим ныне, вернии,/ святую двоицу преподобных матерей,/ инокинь честных наставниц,/ ангельскаго жития ревнительниц,/ престольнаго града заступниц,/ и с любовию к ним возопим:/ о, предивныя ходатаицы к Богу,/ усердными мольбами вашими/ сподобите нас прияти мир и велию милость.
Радуйтеся, предивныя наставницы,/ Иулиание преблаженная и Евпраксие прехвальная,/ вы бо трудами неусыпными,/ послушанием и смирением дух мирен стяжали есте./ Темже, Царствие Небесное улучившя,/ благочестию и любви научаете/ с верою к вам притекающих/ и просящих подати мир и велию милость.
Слава, глас 2:
Днесь прославим, вернии,/ Христа Бога нашего,/ дивнаго во святых Своих,/ явившаго земли Российстей/ прехвальныя и богоносныя жены,/ преподобную Иулианию,/ первую игумению земли Московския,/ и святую Евпраксию, сестру ея возлюбленную,/ и тако возопиим:/ молитвами, Господи, святых угодниц Твоих/ помилуй и спаси нас.
И ныне, Богородичен: Прейде сень законная:
Вход. Прокимен дне. И чтения 3 преподобническая.
На литии стихира храма.
Слава, глас 8:
Срадуйтеся нам, вся верных множества,/ стольный бо град Москва/ днесь немолчными гласы воспевает/ светоносную и преславную память/ преподобных Иулиании и Евпраксии,/ тыя бо усердно молят Христа Бога нашего,/ даровати нам мир и велию милость.
И ныне, Богородичен: Безневестная Дево:
На стиховне стихиры, глас 2.
Подобен: Егда от Древа:
Красоты мира суетнаго пренебрегшя/ и на тесный путь стопы вашя направившя,/ преподобныя Иулиание и Евпраксие,/ бдения и пощения в житии претрудном,/ яко древния подвижницы, подъяли есте./ Сего ради ныне утешения от Господа/ и непрестаннаго веселия сподобляетеся,/ мы же вам вопием:/ радуйтеся, претеплыя предстательницы/ и молитвенницы о душах наших.
Стих: Дивен Бог во святых Своих,/ Бог Израилев.
Присно в страсе Божии пребывающя,/ воздержанием распясте плоти вашя/ и лествицею добродетелей взыдосте во обители Горния,/ идеже, со святыми веселящяся,/ вознесите, угодницы Божия, молитвы ко Господу/ о почитающих пресветлую память вашу и вопиющих:/ радуйтеся, жены преподобныя,/ православным людем заступление.
Стих: Честна пред Господем/ смерть преподобных Его.
Восхвалим, вернии, боголюбивыя жены,/ преподобныя Иулианию и Евпраксию,/ нищеты Христовы рачительницы,/ смирения хранительницы,/ благочестия наставницы,/ иноческаго жития устроительницы,/ сирых утешительницы,/ недужных целительницы/ и земли Московския молитвенницы.
Слава, глас 6:
Подвигом добрым подвизавшяся,/ всеблаженныя Иулиание и Евпраксие,/ Троицу Пресвятую и Пребожественную/ в житии вашем прославляли есте,/ Ейже ныне со ангельскими лики предстоящя,/ не оставите зовущих вам:/ радуйтеся, инокинь наставницы/ и молитвенницы о душах наших.
И ныне, Богородичен: Творец и Избавитель мой, Пречистая:
Тропарь, глас 1:
Христу Жениху уневеститися возжелавшыя/ и подвиги иноческия Того ради понесшыя,/ добродетельным житием и любовию ко всем/ себе украсившыя, преподобныя Иулиание и Евпраксие,/ во граде Москве первыя обители девическия/ устроительницы явистеся/ и трудов и подвигов брата вашего святителя Алексия/ ревнительницы показастеся./ Сего ради, ныне на Небесех вкупе с ним торжествующе,/ молите граду Москве в Православии утвердитися,/ обители вашей сохранитися/ и спастися душам нашым.
Ин тропарь, глас тойже:
Христу Жениху уневеститися возжелавшыя,/ преподобныя Иулиание и Евпраксие,/ во граде Москве обители девическия устроительницы явистеся/ и брату вашему, святителю Алексию, в подвизех подражасте./ Сего ради, ныне на Небесех вкупе с ним торжествующе,/ молите обители вашей сохранитися,/ граду Москве в Православии утвердитися/ и спастися душам нашым.
На утрени
На Бог Господь: тропарь тойже, дважды, Слава, и ныне, Богородичен.
По 1-м стихословии седален, глас 8:
Возложшя всю надежду на Бога Вышняго,/ попечения суетная остависте, преподобныя Иулиание и Евпраксие,/ темже житие восприясте со безплотными Ангелы и, яко звезды пресветлыя, просветистеся./ Мы же взываем к вам:/ молите спастися душам нашым.
Слава, и ныне, Богородичен:
Буди нам покров и заступление, Премилостивая Владычице Богородице,/ Ты бо еси немощным Стена необоримая/ и безнадежным твердое Упование.
По 2-м стихословии седален, глас 2:
Воспоим, вернии, преподобныя матери нашя Иулианию и Евпраксию/ и восхвалим Господа, прославльшаго святыя Своя/ и дарующаго нам мир и велию милость.
Слава, и ныне, Богородичен:
Бога из Тебе воплотившагося познахом, Пречистая Дево, едина Благословенная./ Темже, благодаряще, вопием Ти:/ радуйся, Благодатная, Господь с Тобою.
По полиелеи седален, глас 1:
Преподобныя Иулиание и Евпраксие/, подвижницы Христовы, инокинь московских начальницы,/ кротости и целомудрия рачительницы,/ милости просящим подательницы,/ болезней душевных и телесных целительницы,/ молите Христа Бога даровати нам мир и велию милость.
Слава, и ныне, Богородичен:
Избранная от рода человеческаго Ты еси, Пречистая Богородице,/ Тобою бо к нам сошел есть Христос Бог наш./ Егоже моли спасти душы нашя.
Степенна, 1-й антифон, 4-го гласа. Прокимен: Дивен Бог во святых Своих,/ Бог Израилев. Стих: В церквах благословите Бога,/ Господа от источник Израилевых. Всякое дыхание: Евангелие от Матфея, зачало 104.
По 50-м псалме стихира, глас 6:
Песни духовныя приносяще,/ днесь умиленно вопием вам,/ угодницы Христовы, Иулиание и Евпраксие,/ первопрестольнаго града похвало/ и обители Зачатиевския украшение,/ молитеся о нас, любовию вас почитающих,/ да Царствия Небеснаго будем наследницы.
Канон, глас 8.
Песнь 1
Ирмос: Колесницегонителя фараоня погрузи,/ чудотворяй иногда/ Моисейский жезл, крестообразно поразив/ и разделив море:/ Израиля же беглеца, пешеходца спасе,/ песнь Богови воспевающа.
Сподоби нас, Господи,/ достойно воспети постническия подвиги и преславная чудеса преподобных Иулиании и Евпраксии,/ в них же имя Твое славно прославися.
Возлюбившя от юности всемилостиваго Бога,/ иноческий путь избрали есте, святыя,/ и, обеты монашеския даже до конца соблюдшя,/ спасение обрели есте.
Ведая всеблагий Господь благое желание сердец ваших,/ благослови обитель девичию во славнем граде Москве устроити,/ идеже ищущии спасения Христа обретаху.
Богородичен: Тебе, Премилостивая Владычице, усердно молимся/ и всю надежду на Тя возлагаем./ Избави от всякия скорби и нужды страну нашу Российскую.
Песнь 3
Ирмос: Утверждей в начале Небеса разумом/ и землю на водах основавый,/ на камени мя, Христе, заповедей Твоих утверди,/ яко несть свят паче Тебе, Едине Человеколюбче.
Древним преподобным женам подражающя, Иулиание и Евпраксие,/ на земли ангельски пожили есте,/ темже и ныне с Небесными Силами во обителех райских сликовствуете.
Любовию и чистотою сердечною уневестилися есте Единому Жениху Небесному/ и, верность Ему соблюдшя,/ с мудрыми девами в брачный чертог вошли есте.
Яко верныя ученицы,/ предали есте себе, блаженныя, в послушание святителю Алексию,/ брату вашему по плоти,/ с нимже ныне возносите теплыя молитвы за землю Русскую.
Богородичен: Тебе, Пречистая Владычице,/ песнь хвалебную приносим,/ яко Рождшимся от Тебе род человеческий спасеся.
Седален, глас 4:
Днесь людие московстии, собравшеся во обитель Зачатьевскую,/ радости исполняются и со умилением взывают:/ о, преподобныя жены, Иуалиание и Евпраксие,/ сохраните место святое сие и не престаните молитися о нас,/ недостойных чадех ваших,/ честную память вашу празднующих.
Слава, и ныне, Богородичен:
Спаси от бед рабы Твоя, Богородице,/ яко вси по Бозе к Тебе прибегаем,/ яко нерушимей Стене и Предстательству.
Песнь 4
Ирмос: Ты моя Крепость, Господи,/ Ты моя и Сила,/ Ты мой Бог, Ты мое Радование,/ не оставль недра Отча,/ и нашу нищету посетив./ Тем со пророком Аввакумом зову Ти:/ силе Твоей слава, Человеколюбче.
Любве ради ко Христу вся земная ни во чтоже вменившя,/ труды многия во обители понесли есте./ Ныне же, блаженныя, радуетеся со ангелы в чертозе Царя Небеснаго,/ прославляюще Его неизреченную милость.
Не дали есте сна очима вашима, ни дремания веждома,/ но бодрено в житии Христу послужившя/ и любовь к людем явившя, святыя,/ образ добронравнаго жития иноком показали есте.
Приемшя светильники вашя и елеем добродетелей исполнившя, преподобныя,/ изыдосте в сретение Жениху Христу,/ Иже и введе вас в чертог небесный.
Богородичен: Молим Тя, Дево, Мати Пречистая,/ подаждь нам прощение множества прегрешений/ и исцели душы нашя.
Песнь 5
Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго;/ но обрати мя и к свету заповедей Твоих/ пути моя направи, молюся.
Возлюбившя покаяние, воздержание предивное явисте/ и, святым житием себе украсившя, удалистеся славы земныя./ Сего ради обретосте славу жизни небесныя и радость неизреченную.
Яко кадило благовонное, быша молитвы вашя, преблаженныя,/ имиже и ныне всех, приходящих к вам с верою и любовию,/ на путь спасения наставляете.
Во дни святительства брата вашего Алексия явилися есте светильницы благочестия,/ дарующя сирым и убогим утешение,/ страждущим же и немощным заступление.
Богородичен: Творец всех явися из Тебе, Пречистая Владычице,/ милостивно нас возлюбивый/ и от работы вражия избавивый.
Песнь 6
Ирмос: Очисти мя, Спасе,/ многа бо беззакония моя,/ и из глубины зол возведи, молюся:/ к Тебе бо возопих, и услыши мя,/ Боже спасения моего.
Не прельсти вы лукавый соблазнами мира сего и сластьми житейскими,/ но, мужественне его препобедившя, преподобныя,/ в терпении стяжали есте душы вашя.
Сердца вашя обители Духа Святаго соделаша, святыя,/ темже и нам помозите сердца очистити от всякия скверны,/ наставницы премудрыя.
Огнь Божественныя любве имущя в душах вашых, молитвенницы чудныя,/ светом Христовым просветите душы/ верою и любовию почитающих вас.
Богородичен: Пречистая Богородице Дево,/ укрепи веру Православную в стране нашей/ и сохрани нас от всякаго зла.
Кондак, глас 2:
Что вас наречем, богомудрыя Иулиание и Евпраксие?/ Немощныя сосуды естеством,/ но подвиги и труды мужески понесосте;/ смиренныя жены,/ но славы отцев воистинну сподобистеся;/ рода честнаго от земных,/ но умалением себе Небеснаго отечества достигосте./ Молите усердно Владыку Христа спастися душам нашым.
Икос:
Христову Церковь украсившя житием вашим, преподобныя Иулиание и Евпраксие,/ дивныя наставницы в подвизех иночествующым/ и утешительницы всем притекающым к вам явилися есте./ Сего ради ныне восхваляем вас песньми духовными, жены богомудрыя,/ и с любовию взываем:/ молите усердно Владыку Христа спастися душам нашым.
Песнь 7
Ирмос: Божия снизхождения/ огнь устыдеся в Вавилоне иногда,/ сего ради отроцы в пещи радованною ногою,/ яко во цветнице ликующе, пояху:/ благословен еси, Боже отец наших.
Общаго жития женскаго на Руси ревнительницы бывшя, премудрыя Иулиание и Евпраксие,/ собрасте многия инокини во обитель вашу,/ юже не оставите молитвами вашими.
Всем приходящым к вам были есте, яко матери и сестры любезныя:/ алчущих напитавшя, жаждущих напоившя,/ странных упокоившя, скорбящих утешившя.
Видя Господь веру вашу и усердие преизрядное, преблаженныя Иулиание и Евпраксие,/ дарова вам благодать чудеса творити,/ да прославят люди Бога, дивнаго во святых Своих.
Богородичен: Помилуй нас, Владычице, Мати Бога нашего,/ чающих Твоея помощи и заступления,/ Тя бо едину по Бозе Заступницу имамы.
Песнь 8
Ирмос: Седмерицею пещь/ халдейский мучитель/ богочестивым неистовно разже,/ силою же лучшею спасены сия видев,/ Творцу и Избавителю вопияше:/ отроцы благословите,/ священницы, воспойте,/ людие, превозносите во вся веки.
Сугубую благодать восприемшя,/ боголюбивых жен явилися есте наставницы прехвальныя./ С ними же Христу Богу и Церкви святей добре послужили есте.
Богобоязненна и благочестива бывши, преподобная Иулиание,/ научала еси ближния твоя благоговению и страху Божию,/ имиже всяк, хотяй спастися,/ обрящет премудрость и любовь Божию.
Единаго Бога взыскующи,/ имела еси собеседники Ангелы Божия, преподобная мати Евпраксие./ Ныне же с ними воспеваеши славу Троице Единосущней и Нераздельней.
Богородичен: Превечнаго Бога родила еси, Пресвятая Мати Дево,/ Егоже поем и превозносим во вся веки.
Песнь 9
Ирмос: Ужасеся о сем Небо/ и земли удивишася концы,/ яко Бог явися человеком плотски,/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.
Яко горлицы непорочныя и голубицы чистыя,/ принесли есте душы вашя в жертву живую Христу, Богу нашему,/ Егоже ныне со всеми святыми величаете.
Днесь ликовствуют людие и воспевают Господеви песнь благодарственную:/ слава Тебе, Боже,/ даровавшему престольному граду Москве святыя заступницы.
Радуйся ныне обитель Зачатиевская, града Москвы украшение,/ в тебе бо прославишася преподобныя жены Иулиания и Евпраксия,/ благочестием и добронравным житием возсиявшыя.
Богородичен: Очисти нас от всякия скверны, Пресвятая Мати Дево,/ и избави муки вечныя,/ Ты бо еси Заступница всесильная рода христианского.
Светилен:
Пресветлую память вашу празднующе,/ умиленно взываем к вам, досточудныя Иулиание и Евпраксие:/ молитеся ко Господу,/ да и мы сподобимся быти причастники света невечерняго.
Слава, и ныне, Богородичен:
Исповедуем Тя, Всенепорочная Дево, Владычицу Богородицу,/ родила бо еси Бога неизреченно,/ даровавшаго нам спасение и велию милость.
На хвалитех стихиры, глас 2:
От юности Бога возлюбившя,/ преподобныя Иулиание и Евпраксие,/ иноческаго жития возжелали есте/ и, к подвигом поста и бдения устремившяся,/ непрестанною молитвою сердца очистили есте,/ темже Бог обогати вы даром исцеления/ и многими чудесы прослави./ Емуже возопиим: Господи, слава Тебе.
Благословением митрополита Алексия,/ святаго брата вашего,/ обитель девичию устроили есте,/ преподобныя Иулиание и Евпраксие,/ в нейже благочестно пожившя,/ ко спасению многия привели есте./ Темже, ныне во обителех Небесных пребывающя,/ с радостию взываете: Господи, слава Тебе.
Боголюбивыя жены земли Российския,/ преподобныя Иулиание и Евпраксие,/ страну Московскую обителию украсившыя/ и образ добронравнаго жития показавшыя,/ трудолюбием и нищелюбием Богу угодили есте./ Темже, ныне во обителех Небесных пребывающя,/ с радостию взываете: Господи, слава Тебе.
Слава, глас 8:
Воспоим, вернии, преподобныя Иулианию и Евпраксию,/ святыя обители Зачатиевския начальницы,/ земли Российския усердныя молитвенницы/ и первопрестольнаго града Москвы заступницы,/ и возопиим Христу Богу нашему:/ дивный во святых Своих, Боже наш, слава Тебе.
И ныне, Богородичен, глас тойже:
Владычице, приими молитвы раб Твоих /и избави нас/ от всякия нужды и печали.
Славословие великое и отпуст.
На литургии служба преподобническая.
Молитва
О, преподобныя Иулиание и Евпраксие, подвижницы Христовы, инокинь московских наставницы и всех прибегающих к вам скорыя помощницы! Вы от юности Бога возлюбившя, иноческаго жития возжелали есте и благословением митрополита Алексия, святаго брата вашего, обитель девичию устроили есте. В нейже, усердно потрудившяся, молитвою, постом и бдением сердца очистили есте и образ благонравнаго жития показали есте. Темже, яко имеющя дерзновение ко Всемилостивому Спасу, сохраните обитель сию и град Москву от всяких бед и напастей, нашествия иноплеменников и междоусобныя брани. Нам же, почитающим вас любовию, даруйте мир и единомыслие, да, вашыми молитвами соблюдаеми и сохраняеми, исповедуем Святую Троицу, Отца и Сына и Святаго Духа. Аминь.
